UKA 2001/ 20
Takornariartitsisarnermik inuussutissarsiuteqarnerup aamma nunami inuussutissarsiutit siuarsarneqarnissaat pillugit Inatsisartut inatsisaannut siunnersuummut nassuiaatit
Nassuiaatit nalinginnaasut
Nunatsinni inuussutissarsiutinik ineriartortitsinermi killigititat pitsanngorsarniarlugit inuussutissarsiutinik siuarsaanerup iluani inatsisit pisariunnginnerulersinnissaat suliniutigalugu Naalakkersuisut aallartinnikuuvaat. Tamatuma inerneraa takornariartitsisarnermik inuussutissarsiuteqarnermut aningaasalersuinikkut tapersiisarneq pillugu Inatsisartut inatsisaat 1996-imeersoq aamma nunami inuussutissarsiutinut aningaasalersuinikkut tapersiisarneq pillugu Inatsisartut inatsisaat 1998-imeersoq massakkut Inatsisartut inatsisaanni katinneqarmata. Inatsisit ataatsimut katinneqarnerat Inuiaqatigiit aaqqissugaanerat pillugu iliuusissatut pilersaarummut 2000-imi ukiakkut ataatsimiinnermi saqqummiunneqartup piviusunngortinnissaanut taamatuttaaq alloriarneruvoq.
Tassani "namminersorluni inuussutissarsiutinut killigititat pitsaanerunissaat" pillugit suliniuteqarnermi tunngaviusumik periaatsit ilaatigut tassaapput paasiuminassuseq (ilaatigut tunngavissat tigussaasut atorlugit) aaqqissuussinermi angusaqarluarnerunissat (ilaatigut aningaasalersuinermi "putut" matunerisigut) aamma Namminersornerullutik Oqartussat aningaasaqarnermi peqataanerata namminersortut aningaasaqarnermi peqataanerannut malinnitsinneratigut. Anguniagaq ilaatigut tassaavoq inuussutissarsiutit ingerlanneqartut assigiinngiiaarnerulersinnissaat aamma suliffeqarfiit unammillersinnaanerisa nukittorsarneqarnissaa.
Inatsisartut inatsisaata matuma imaata assigerluinnangajappaa nunami inuussutissarsiutinut aningaasalersuinikkut tapersiisarneq pillugu Inatsisartut inatsisaani siusinnerusukkut atuuttumi tunngavigineqartut. Tamatumunnga pissutaavoq inatsimmit tassannga misilittakkat pitsaasuummata. Tassunga peqatigitillugu anguniagaq pingaarutilik aamma tassaavoq tapersiissutitut aningaasaliisarneq ajornanngitsunnguamik pisussaaffeqanngitsumillu aningaasannaffissatut isigineqarunnaarluni kisiannili ajornannginnerusumik annaasaqaratarsinnaagaluarluni aningaasaliinertut isigineqarnissaata tunngavittut aalajangiusimanissaa.
Inatsit taamaalilluni ilusilersorneqarpoq takornariartitsinermik inuussutissarsiuteqarnermut aamma nunami inuussutissarsiutinut inuit suliffeqarfiillu aningaasanik pissarsinissamut assigiiaarnerusumik periarfissaqalernissaat siunertaralugu. Tamatuma sunniutaanut assersuutitut taaneqarsinnaavoq takornariartitsinermik inuussutissarsiuteqarnermi inuit suliffeqarfiillu kinguaariit nikinneranni aningaasanik ajorsarnerannut atatillugu aamma taarsigassarsinissamut qularnaveeqquserneqarsinnaalermata. Assersuutit aappaattut taaneqarsinnaavoq nunami inuussutissarsiutit aamma qularnaveeqquserneqarsinnaalermata tunisassiat ineriartortinnerannut atatillugu. Assersuutit pingajuat tassaavoq tunisassianik ineriartortitsinermut tapiiffigineqarnissamut aalajangersakkat inuussutissarsiutini marluusuni taakkunani aamma assigiilermata. Susassaqarfiit taakku marluk akornanni tapiissuteqartarnermut piumasaqaataasut annertunerusumik naligiissinneqalernissaata anguniarneqarnissaa siunertaasimavoq.
Taamaakkaluartoq nunami inuussutissarsiutini aamma takornariartitsisarnermik inuussutissarsiutini ataaseq pillugu suli immikkoortitsineqarpoq. Taamaattoqarneranut aningaasaateqarfiup Unnuisap takornariartitsisarnermik inuussutisarsiuteqarnermi unnuisarfiliornissamut taarsigassarsisitsisarneranut tunngassuteqarpoq. Tamatumunnga ilaatigut pissutaavoq aningaasaateqarfiup siunertaanut aalajangersagaq ilaneqarluni annertusineqarmat, taamaalillunilu tamatuma sunniutai aatsaat piffissap ingerlareernerani malunniuttussaallutik, suli aammaarluni allanngortitseqqittoqannginnerani. Ilaatigut unnuisarfinnut taarsigassarsisitsisarneq pissutsinik assigiinngitsunik ilaqarnera pissutaalluni piuminaattarmat, soorlu aallarnisaasartunut aningaasalersuinikkut tapersiisarnermit. Taamaattumik aningaasaateqarfiup tassunga immikkut ittumut tunngatillugu oqartussaassuseqarnerata pigiinnarnissaa naleqquppoq.
Allaffissornikkut ingerlatsinermut sunniutissai:
Suliffimmik aallarniinissamut, kinguariit nikinnerannut aamma tunisassianik ineriartortitsinermut tapiissuteqartarnerup qularnaveeqqusiisarnerullu aalajangiivigisarnerisa tiguneqarnerat Namminersornerullutik Oqartussanut allaffissornikkut ingerlatsinermi arlalitsigut sunniuteqassaaq, tassa allaffissornikkut ingerlatsinermi nammatat annertusiallattussaassammata.
Inatsisartut Ombudsmandiata inassuteqarneratigut nunami inuussutissarsiutinut aningaasalersuinikkut tapersiisarnerup allaffissornikkut aqunneqarnera nalinginnaasumik allaffissornermi ingerlaatsimut ilanngunneqarpoq qulliunerusunut naammagittaalliorsinnaanermik kinguneqartussaalluni, taamaammat nunami inuussutissarsiutit pillugit naammagittaalliuuteqartarfik atorunnaarsinneqarsinnaanngorpoq.
Tamanna innuttaasunut suliffeqarfinnullu pitsaanngitsumik sunniuteqartussaanngitsutut nalilerneqarpoq.
Aningaasatigut sunniutissai:
Inatsisissatut siunnersuut immini aningaasatigut sunniuteqassanngitsoq tunngavigineqarpoq. Suliniutit qanoq annertutiginissaanik kissaateqarneq aalajangersarneqartassaaq ukiumoortumik aningaasanut inatsisinut atatillugu.
Aalajangersakkanut ataasiakkaanut nassuiaatit:
§ 2-mut
Imm. 1-imut
Taaguut "nunami inuussutissarsiutit" suliffeqarfinnut aalajangersimasuunngitsunut atorneqarpoq ilaatigut sulianut aalajangersimasunut makkununnga: Niuerneq, sanaartorneq sanaartukkallu, kiffartuussineq, akunnittarfeqarneq neriniartarfeqarnerlu, siunnersuineq, tunisassiorneq. Taakorneqartut tamakkiisutut isigineqassanngillat.
Imm. 2-mut
Aalisartut, piniartut nunalerinermillu ingerlataqartut tapersiissuteqarfigineqarnissamut qinnuteqarsinnaapput siunertanut aalisarnermut, piniarnermut nunalerinermullu tapersiisarneq pillugu Inatsisartut peqqussutaanni ilaatinneqanngitsunut.
§ 3-mut Imm. 1-imut
Nunatta karsiata akiitsunut pisussaaffiisa pitsaasumik aqunneqarnissaat mianeralugu qularnaveeqqusiissutissat annerpaaffissaat ukiut tamaasa aalajangiivigineqartassapput. Naak Nunatta karsiata aningaasatigut nammakkerneqarnera aatsaat malunniuttassagaluartoq qularnaveeqqusiissutip akilertariaqalernerani, taamaattoq Inatsisartut aningaasanut inatsisaani ukiumi pineqartumi qularnaveeqqusiissutit amerlanerpaaffissaat ilaatinneqartassaaq. Tamanna inatsisip siunertaanut pissaaq ukiumi aningaasaliissutinut tunngatillugu oqaasertaliussami.
Tunisassianik ineriartortitsineq pillugu taaguummi sullissinerit aamma tunisassiat ilaatinneqarput.
§ 4-mut Imm. 1-imut
Immikkoortoq 1-imi nassuiarneqarpoq unnuisarfiit inatsimmi qanoq paasineqassanersut. Taaguummi tassani pineqarput akunnittarfiit, pisullutik angalaartut unnuisarfii, illuaqqat asimiittarfiit illunullu assingusumik aaqqissuussinerit allat takornarianut Nunatsinniikkallartunut unnuinerminnut akiliuteqartartunut unnuiffissatut aaqqissuussat.
Unnuisarfinnik taasanut aamma ilaapput atortorissaarutit allat unnuinermut toqqaannartumik attuumassuteqartut, soorlu uffarfiit atortorissaarutillu allat sanaassamik suliniummut ilannguttariaqartut, soorlu init nerisarfik imaluunniit sutorniartarfik igaffittalik init amerlineqarnerannit pisariaqartinneqalersoq.
§ 5-imut Immikkoortoq 1-imi pineqarput suliffeqarfimmik pilersitsineq (nr. 1) kinguaariit nikinneranni aningaasatigut ajornartoortut ingerlaqqinnissaat (nr. 2) aamma unnuisarfinnik pilersitsineq, allilerineq iluarsaassinerlu (nr. 4) inatsisitut atuussimasunit ingerlatitseqqiinerupput. Inuussutissarsiutini nunami ingerlatani tunisassianik ineriartortitsinermut qularnaveeqqusiineq (nr. 3) aalajangersagaavoq nutaaq, tassani naligiissinneqarlutik nunami inuussutissarsiutit aamma takornariartitsisarnermik inuussutissarsiutiteqarneq.
Aalajangesakkat ataasiakkaat pillugit oqaaseqaatittaaq ataaniittut innersuussutigineqarput.
§ 6-imut Kinguaariit nikinnerannut atatillugu aaqqissuussinermi siunertaavoq periarfissaqarnissaq qularnaveeqqusiinissamut kinguaariit nikinnerat pissusissamisut ingerlagaluartoq avataaneersut sunniuteqarneratigut piviusunngortinneqarsinnaajunaaraangat.
Kinguaariit nikinnerat pitsaanerpaajusarpoq piviusunngortikkiartuaassallugu ukiut arlallit ingerlaneranni, taavalu kinguaariit ilaat tunuartussaq piffissap ingerlanerani toqugaangat taava kingornussisussat kissaatigisinnaasarpaat suliffeqarfimmit ima amerlatigisunik kingornussassanik aningaasannannissaq, kinguaariit nikinnissaat piviusunngortinneqarsinnaajunnaartarluni suliffeqarfillu matuinnartariaqalersarluni.
Taamatut pisoqarsinnaanera ilaatigut eqqarsaatigalugu Naalakkersuisut inuussutissarsiutigalugu aningaasaliisarnermik ilisimasallit peqatigalugit ikiuussinnaassapput kinguaariit nikinnerata piviusunngortissinnaanissaata isumagineqarnerani. Immikkut ilisimasallit naliliinerat naapertorlugu pineqarpoq kinguaariit nikinnerat aningaasat tungaasigut isigalugu isumatusaarnerusoq isumagissallugu.
§ 7-imut Imm. 1-imut
Immikkoortoq 1-imi erseqqissarneqarput sanaassanik suliniutit qularnaveeqquserneqarnissaannik taarsigassarsissutiginissaannilluunnit qinnuteqaatigineqarsinnaasut. Tassani pineqarput illuni pioreersuni siunertanut allanut atorneqarsimasuni unnuisarfiliornissaq (imm. 1, nr. 1), illunik pioreersunik unnuisarfittut atorneqartunik allilerinissaq (imm. 1, nr. 2), illuni nutaani unnuisarfiliornissaq (imm. 1, nr. 3) aamma unnuisarfinnik pioreersunik iluarsaassineq (imm. 1, nr. 4). Iluarsaassinermi pineqanngillat ataavartumik aserfallatsaaliineq nalinginnaasumillu iluarsaassineq, soorlu qaqorterineq, qalipaaneq aamma iikkanik qilaamillu ungalisalersuineq kiisalu naqqit suliarinerat.
Takornariartitsisarnermik inuussutissarsiuteqarnermut aningaasalersuisarnikkut Inatsisartut inatsisaata UKA 2000-imi suliarineqarnerani tapiliullugit sanaassanik suliniutit pineqartut ilanngunneqarnerat isumagineqarpoq. Allannguinerit sammisaqarfik pillugu misissueqqissaarnermik aallaaveqarpoq, Inatsisartunit 2001-imut aningaasaliiffigineqartumit.
Imm. 2-mut
Suliniutit ataasiakkaat nalilersornerini pingaartinneqassaaq, teknikikkut isumannaatsuunissaat aamma siunissaq isigalugu aningaatigut imminut akilersinnaanissaat. Teknikikkut isumannaatsuutitsinissamik nalilersuinermi sulianut tunngasuni nalit atorneqartut aamma maligassiat tunngavigineqassapput. Aningaasatigut imminut akilersinnaassuseq pillugu nalilersuinermi ingerlatsinermi aningaasarsiornermik nalilersuisarneq aallaavigineqassaaq.
§ 8-mut Imm. 1-5-imut
Qularnaveeqqusiisoqarsinnaavoq taamaallaat taarsigassarsianut niueqatigiinnermi atugassarititaasut malillugit taarsigassarsiarineqarsimasunut aningaaserivimmi realkreditinstituttimi akuerisaasumi imaluunniit Nunat Avannarliit Killiit Aningaasaateqarfianni. Aningaasaliisarnermik ingerlataqarfiit tamakkerlugit nalunaarsorneqarput.
Aningaasaliisarnermik ingerlataqarfiit taaneqartut tamarmik nunatsinni ingerlataqartuupput. NORA, Sulisa A/S aamma kommunit inuussutissarsiornermut suliffissaqartitsiniarnermullu aaqqissuussineri matumani ilaatinneqannngillat, tassami aaqqissuussinermi siunertaammat niueqatigiinnermi nalinginnaasumik atugassarititaasut naapertorlugit taarsigassarsinermut qularnaveeqqusiisarneq. Taamatut aaqqissuussineq toqqarneqarpoq Nunatsinni aningaasalersuisarnermi unammilleqatigiinnermik kiputtoortitsinissaq sapinngisamik killilersimaarniarlugu.
Qularnaveeqqusiisoqarsinnaavoq taarsigassarsiat annerpaamik 50%-iinut aamma taarsigassarsiat sivisunerpaamik ukiuni qulini taarsersorneqartussaasariaqarput. Taamaalilluni pisortat aamma aningaasaliisartut namminersortut ataatsimut annaasaqaratarsinnaapput taavalu nammineq aningaasaatiginngisanik aningaasaliisartutut attaveqaataasoq piumassuseqarnerulissalluni namminneq - taamalu aamma pisortat - annaasaqaratarsinnaanermik sapinngisamik minnerpaatinniarnissaanut.
Pisortat annaasaqaratarsinnaanerisa qummut killilerneratigut qulakkeerneqassaaq inuussutissarsiutigalugu nammineq aningaasaatiginngisanik aningaasaliisartutut attaveqaataasut taamaallaat aningaasaliiumanissaat tamanna immikkut ilisimasalittut isumatusaarnertut nalilerunikku.
Inuussutissarsiuteqarneq pillugu Inatsisartut inatsisaat naapertorlugu inuussutissarsiummik ingerlataqarsinnaatitaasut pingaarnertut maleruagassat malillugit Nunatsinnut tamakkiisumik akileraartussaatitaassapput. Qularnaveeqqusiissuteqartarneq Nunatsinni inuussutissarsiummik ingerlatsisinnaatitaasunut taakkununngarpiaq saaffiginnippoq.
Imm. 4-mut:
Immikkut ilisimasalittut aningaasaqarnermik naliliinermi ersersinneqarsinnaassaaq ingerlatsinermut aqutsinermullu tunngatillugu piginnaasassat pisariaqartinneqartut pigineqarnerat.
§ 9-mut Namminersornerullutik Oqartussat inissisimalissapput piumasaqaatinut sumiginnakkat, nammineq aningaasaatiginngisanik aningaasalersuisartutut attaveqaataasup akiitsulinnut piumasaqaatanut, Namminersornerullutik Oqartussat akiliisussatut pisussaaffiata annertussusianut naleqqiullugu naapertuuttumik.
Naalakkersuisut aamma aningaasaliisarnermik ingerlataqarfik marluullutik taarsigassarsiaritamut pisussaaffeqarnerat isumaqarpoq, aningaasaliisarnermik ingerlataqarfimmut kajuminnarnerussasoq qularnaveeqqusiissutip piviusunngortinneqarnissanik aatsaat piumasaqassasoq, taarsigassarsititsinermi aaqqissuussinerup ingerlatiinnarnissaanut periarfissat piviusut tamarmik atorneqareerpata.
§ 10-mut Imm. 1-imut
Aningaasaateqarfiup Unnuisap siunertaa pingaarneq tassaavoq taarsigassarsisitsissalluni ernialerlugit taarsigassarsiatut imaluunniit taarsigassarsiat erniaqartillugu taarsersuutitaqanngitsut aamma taarsigassarsiat erniallit akuleriissillugit, takornariat unnuisarfissaannik pilersitsinissamut, alliliinissamut aamma iluarsaassinissamut atugassanik. Aningaasaateqarfiup ernialerlugit taarsigassarsisitsisinnaanera inatsimmi aalajangersagaavoq nutaaq. Aningaasaateqarfiup tamatuma saniatigut isumagisinnaavai qularnaveeqqusiinissamut atatillugu suliassamik piareersaaneq aamma periarfissanik misissuineq takornariartitsisarnermullu tunngasunik periarfissanik misissuineq aamma suliassanik nutaanik sulissutiginninneq. Aningaasaateqarfik taamaalilluni periarfissaqarpoq misissueqqissaarnernik, periarfissanik piviusunngortinneqarsinnaasunik misissuinernik assigisaannillu pilersitsissalluni, aningaasaateqarfiup isumaa naapertorlugu unnuisarfitsigut neqeroorutit aamma pitsaassutsit takornariartitsisarnermik inuussutissarsiuteqarnermi massakkorpiaq naatsorsuutigineqartumillu pisariaqartitsinissamik ilimagisat naleqqussarneqarnissaanut atugassanik.
Imm. 2-mut
Immikkoortoq 2-mi takuneqarsinnaavoq, aningaasaateqarfik pilersinneqartoq Namminersornerullutik Oqartussat aningaasanngorlugit akilerlugit aningaasaliissuteqarnerisigut. Takuneqarsinnaavoq tamatuma kingorna, aningaasaateqarfimmut aningaasanut inatsit aqqutigalugu aammaarluni aningaasaliisoqarsinnaasoq. Tamatumunnga tunngavilersuutigineqarpoq nalilerneqarmat inatsisitigut pituttugaasumik ukiumoortumik aningaasaliissuteqartarneq naleqqutinngitsoq, tamatumani aalajangiisuulluni apeqqutaammat ukiumoortumik aningaasanut inatsisissap isumaqatigiinniutigineqarnerani pingaarnersiuilluni tulleriinnilersuineq. Aningaasaateqarfik Namminersornerullutik Oqartussanit maannamut aningaasaliiffigineqarpoq katillugit 27 mio. kr.-inik (15 mio. kr.-it 1997-imi aamma 12 mio. kr.-it 1998-imi, kisianni 1999-imi 2000-imilu aningaasaliisoqarani). 2001-imut aningaasanut inatsimmi immikkoortinneqarput 500.000 kr.-it. Aningaasaateqarfik aningaasaliivigineqanngippat imaaratariaannaavoq, aningaasaateqarfiup siunertami naammaginartumik naammassinissaa ajornartorsiutigileraa. Tamatuma saniatigut imm. 2-mi aalajangersagaq periarfissiivoq soqutiginnittut allat aningaasaateqarfimmut aamma aningaasaliisinnaanerat. Soqutiginnittut allat assersuutigalugu tassaasinnaapput aningaasaateqarfiit allat imaluunniit ineriartortitsinermik pilersaaruteqarfiit.
Imm. 3-mut
Aningaasaateqarfiup akisussaaffigimmagu pisortat aningaasaataannik amerlasuunik aqutsineq, imm. 3-mi aalajangersagaqarpoq aningaasaateqarfik Naalakkersuisunit nakkutigineqartoq aamma alapernaanneqartoq, taakkua nakkutigissallugu aningaasaateqarfiup inatsimmi matumani aalajangersakkat malillugit ingerlanneqarnissaa. Tamanna ilaatigut isumaqarpoq, Naalakkersuisut alapernaaffigissagaat aningaasaateqarfik qinnuteqartumut aamma sanaassamut taarsigassarsisitsinersoq piumasaqaatit erseqqinnerusut naapertorlugit, tamannalu pinersoq aningaasaateqarfiup siunertaa malillugu. Naalakkersuisut nakkutilliinermik alapernaannissamillu isumaginninnissaannut aalajangersarneqarpoq, Naalakkersuisut piumasarisinnaagaat paasissutissat pisariaqartinneqartut aningaasaateqarfiup tunniutissagai.
Imm. 4-mut
Imm. 3-mi tunngavilersuutitut taaneqartutulli imm. 4-mi aalajangersagaqarpoq, aningaasaateqarfiup ukiumoortumik naatsorsuutai qaammatisiutit ukiuat malillugu ingerlasut kukkunersiorneqartassasut kukkunersiuisumit naalagaaffimmit akuerisaasumit Naalakkersuisunit toqqakkamit.
Imm. 5-imut
Aningaasaateqarfiup taarsigassarsisitsisarnermi saniatigut aningaasaatini atorsinnaavai ingerlatanut § 10, imm. 1-imi taaneqartunut taakkulu ilai ikittunnguit allaffissornikkut ingerlatsinermut.
Imm. 6-imut
Imm. 6-imi aalajangerneqarpoq aningaasaateqarfik taarsigassarsisitsinermini inatsimmit pituttugaasoq taamaallaallu qinnuteqartup aamma sanaassap piumasaqaatit §§ 4 aamma 7-imi aalajangersarneqartut pisariaqarpallu maleruaqqusat inatsit tunngavigalugu pilersinneqartut eqqortippatigik.
Imm. 7-imut
Aningaasaateqarfik imm. 7 naapertorlugu allatseqarfimmik pilersitsissaaq taamaaliornissarlu suliffeqarfimmut naapertuuttumut isumagisassanngorlugu isumaqatigiissutigisinnaallugu. Tamatumunnga tunuliaqutaasoq tassaavoq, aningaasaateqarfik taamaalilluni periarfissaqassammat allatseqarfimmi suliassat, soorlu ingerlatseqatigiiffimmut namminersortumut, allatseqarfimmik pilersitsereersimasumut saniatigut takornariartitsinermik inuussutissarsiuteqarnermik immikkut ilisimasalimmut, tunniunnissaannut. Periarfissaq taanna eqqarsaatigineqarsinnaavoq atorneqartoq aningaasaateqarfiup allaffissornikkut ingerlatsinermut aningaasartuutai sapinngisamik appasitsinniarlugit.
Imm. 8-mut
Imm. 8-mi qulakkeerneqarpoq qularnaveeqquserneqarnissamik qinnuteqaatip nakerisarsiunngitsumit naliliiffigineqarnissaa.
Imm. 9-mut
Aningaasaateqarfik § 10, imm. 1 naapertorlugu inatsisikkut pilersinneqarmat imm. 9-mi aalajangerneqarpoq aningaasaateqarfik atorunnaarsinneqarsinnaasoq inatsisikkut. Aningaasaateqarfiup atorunnaarsinneqarnerani aningaasaateqarfiup aningaasaatai tamarmik Nunatta karsianut nakkartinneqassapput taavalu Namminersornerullutik Oqartussat aningaasaateqarfiup pisinnaatitaaffii pisussaaffiilu tamaasa tigussavaat.
§ 11-mut Imm. 1-imut
§ 11-mi allaqqavoq, aningaasaateqarfik aqunneqassasoq siulersuisunit tallimanik ilaasortaqartumit taakkununngalu sinniisussanit. Taamatut killilimmik amerlassusilernerannut pissutaavoq qulakkeerniarneqarmat siulersuisut sapinngisamik suleriallammaanissaat. Siulittaasoq siulersuisunilu ilaasortat allat Naalakkersuisunit toqqarneqassapput ukiut marlukkuutaarlugit, aningaasaateqarfiup pilersinneqarneranit aallartittumik. Pingaartinneqarpoq siulersuisut inuussutissarsiornermut paasisimasaqarnissaat. Tamanna anguniarlugu siulersuisunut ilaasortat pingasut taakkualu sinniisussaat Naalakkersuisunit aatsaat toqqarneqassapput Greenland Tourism A/S, Takornariaqarneq pillugu Siunnersuisoqatigiit aamma Kalaallit Nunaanni aningaaseriviit inassuteqarnerisigut - taavalu ilaasortat pingajuat sinniisussaalu - Sulisitsisut Peqatigiiffiannit aamma Nunatsinni Niuernermi, Sullissinermi Assartuinermi Sulisitsisut Kattuffimmit peqatigiilluni. Kiisalu aalajangersakkami aalajangersarneqarpoq aningaasaateqarfimmi siulersuisunut Aningaasaateqarfimmi siulersuisunut ilaasortaaneq inuiaqatigiinni suliassaqartitaanerunngitsoq. Tamanna ilaatigut isumaqarpoq kinaluunniit pisussaaffeqanngitsoq aningaasaateqarfimmi siulersuisunut ilaasortanngornissamut.
§ 12-imut Immikkoortoq 1-imi erseqqissarneqarput taarsigassarsisitsinermi atugassarititat assigiinngitsut.
§ 13-imut Imm. 1-imut
Aaqqissuussinermi pisoqqami ernialinni taarsersuutitalinnillu taarsigassarsititsineq annerpaamik 40%-iuvoq. Taarsigassarsilluni aningaasalersuinerup annerpaaffissaa tassaavoq unnuisarfimmik pilersitsinermut imaluunniit alliliinermut aningaasartuutit 40%-iat. Tapersiissutip procentia aalajangerneqassaaq suliniutit ataasiakkaat imminnut qanoq akilersinnaatiginerat aamma suliniutit allamit aningaasalersorneqarnissaannut periarfissat nalilernerisigut. Sunniutissaatut naatsorsuutigineqarpoq suliniutit allatut iliorluni aningaasaliiffigineqarsinnaanngitsut aammattaarlu imminnut akilersinnaasutut nalilerneqartut aningaasaateqarfimmit siunissaq isigalugu aningaasaliivigineqartarsinnaanerat. Aamma piumasarineqarpoq, taarsigassarsiat erniallit taarsigassarsisitsilluni aningaasalersuutit tamarmiusut minnerpaamik 50%-erissagaat.
Imm. 2-mut
Immikkoortoq 2-mi oqaatigineqarput taarsigassarsiat akilersornissaannut piffissaliussat aamma erseqqissarneqarlutik erniaqanngitsumik taarsersuutitaqanngitsunillu taarsigassarsianut piumasaqaatit. Sivisussusianut piffissaliussamut tunngatillugu anguniarneqarpoq taarsigassarsianut atilequtaasunut tamatuma assingunissaa.
Imm. 3-mut
Immikkoortoq 3-mi erseqqissarneqarput ernialinnik taarsigassarsianut atugassaritat.
Imm. 4-mut
Immikkoortoq 4-mi aalajangerneqarpoq, aningaasaateqarfiup taarsigassarsialiussai qularnaallisassagai unnuisarfiup taarsigassarsisitsissutigineqartup qularnaveeqqusiunneratigut. Qularnaveeqqut tulleriiaarinermi sapinngisamik pitsaanerpaamik inissisimassaaq, tamanna isumaqarluni, aningaasaateqarfik soorunami salliutinneqarsinnaanngitsoq ima pisoqartillugu illuni pioreersuni unnuisarfiit allineqarneranni iluarsaanneqarneraniluunniit unnuisarfinnut qularnaallisaatitut qularnaveeqqusiunneqareersimasunit. Paarlattuanik tamanna aamma isumaqarpoq, aningaasaateqarfiup qularnaveeqqusiinera salliutinneqassasoq nutaamik qularnaallisaatinut naleqqiullugu, soorlu unnuisarfiit allineqarnerat iluarsaanneqarneralluunniit pissutigalugu ingerlatsinermut aningaasalersuinerup pisariaqartitsinerup annertuseriarnera pissutigalugu. Qularnaveeqqusiissut unnuisarfiup pioreersup allineqarnerani iluarsaanneqarneraluunniit, unnuisarfiup allineqarneranik pissuteqartumik ingerlatsinermut aningaasalersuutinit tamatigut salliutinneqartassaaq. Taamatut salliutinneqarnissamik piumasaqaammut pissutaavoq, taarsigassarsisitsisoqartarmat unnuisarfimmik pilersitsinernut, alliliinernut iluarsaassinernulluunniit, tassa ingerlatsinermut tunngaviusunut, taarsigassarsisitsisoqartaranili ingerlatsinermut tapiissutitut.
Qinnuteqartup 40%-imik aningaasalersuisarnikkut tapersiissuteqarfigineqartup pisariaqartissammagu sanaassap ilarujussuata allaninngaanniit aningaasalersorneqarnissaa, soorlu aningaaserivinniit, imm. 4-mi aammattaaq aalajangerneqarpoq, aningaasaateqarfiup qularnaveeqqusiissutaata ataqqissagai allaninngaanniit aningaasaliissutit, taamaattoq aningaasartuutit tamarmiusut § 13, imm. 1-imi taaneqartut, qinnuteqartup sanaassamut atugassatut pissarsiarisimasaasa annerpaamik 40%-ii. Aningaasaateqarfiup qularnaveeqqusiissutaa sallinnguukkiartuaartussatut qularnaveeqqusiissutaanngilaq.
§ 14-imut Imm. 1-imut
Immikkoortoq 1 ilanngunneqarpoq, unnuisarfinnik pilersitsinernut, alliliinernut iluarsaassinernulluunniit taarsigassarsiaritinneqareersut siunertanut inatsisip uuma avataaniittunut atorneqarnissaat pinngitsoorniarlugu.
Imm. 2-mut
Piginnittup nikinneranut tunngatillugu iimmikkoortoq 2-mi aalajangerneqarpoq nutaamik piginnittunngortoq sanaassarlu naliliivigineqassasut §§ 4-mi aamma 7-mi piumasaqaatit malillugit nutaamik naliliinikkut. Tassani pineqarpoq piginnittut nikinnerat, unnuisarfiit assigiinngitsunik pissuteqartumik piginnittuisa taarserneqarnerinut pissutaasut, soorlu tassaasinnaallutik unnuisarfiit nammineq piumassutsimik pinngitsaaliissummilluunniit tunineqarnerat, avinneq toqusoqarneraluunniit.
§ 15-imut Aalajangersakkami oqaatigineqarpoq, taarsigassarsisitsisoqarsinnaasoq kalaallinut, nunani allamiunut suliffeqarfinnulluunniit, taamaallaat piumasaqaataalluni pineqartut piffissami taarsigassarsiat tunniunneqarneranni Kalaallit Nunaanni tamakkiisumik akileraartussaatitaanissaat.
§ 16-imut Imm. 1-imut
Tunisassianik ineriartortitsineq assigiinngitsorpassuarnut tunngassuteqarsinnaasutut matumani isigineqassaaq, tassami tamatumani pineqarmata isumassarsianik ineriartortitsineq ineriartortitseqqinnerlu, assilisassianik sananeq aamma misileraaneq, nioqqutissanik sullissinernillu pioreersunik ineriartortitseqqinneq il.il. Tunisassianik ineriartortitsinermut tapiissutinut tunngatillugu malugeqquneqassaaq, tunisassiap atorneqarsinnaassusia takornariartitsinermi inuussutissarsiuteqarnermut imaluunniit nunani inuussutissarsiutinut killilerneqanngimmat. Assersuutigalugu aaqqissuussineq manna malillugu aalisarnermi atortut, illuaqqat assigisaasalu ineriartortinnissaannut tapiissuteqartoqarsinnaavoq.
Takornariartitsisarnermik inuussutissarsiutip iluani tunisassianik ineriartortitsineq takornariartitsisarnermik inuussutissarsiutip allatigut ineriartortinneranut naapertuutissaaq aammalu nunap immikkoortuini, naatsorsuutigineqartumik pisisussanik tunngavissaqartuni, takornariartitsisarnermik inuussutissarsiuteqarnerup ineriartorneranut siuarsaataasoq. Naatsorsuutigineqarpoq tunisassianik ineriartortitsineq sumiiffimmut pineqartumut nutaarsiassaassasoq.
Imm. 2-mut
Nunanit allamiunik suleqateqarsinnaaneq imaluunniit tunisassiareqqitassanik nunanit allanit pisiortorsinnaaneq aalajangersakkakkut mattunneqanngilaq.
§ 17-imut Imm. 1-3-mut
Aalajangersakkami tassani piumasaqaatit arlaqartut eqqartorneqarput, tunisassianik ineriartortitsinermut tapiiffigineqarnissamut atatillugu eqqortinneqartussat.
Siunertarineqanngilaq tapersiissutit akiliutigineqareersut utertillugit nalinginnaasumik akilersinniarneqartarnissaat tassa tapersiineq tapersiissutinik pissarsisup peqquserlulluni eqqunngitsunik amigaatilinnilluunniit paasissutissiisimaneratigut paatsoortoqarsimassappat.
§ 18-imut Nunami inuussutissarsiutinut tunngatillugu tunisassiank ineriartortitsinermut aningaasalersuinikkut tapersiisarneq pillugu Namminersornerullutik Oqartussat nalunaarutaanni erseqqinnerusumik allaaserineqarpoq Inatsisartut inatsisaata allaffissornikkut ingerlatsineq aqqutigalugu qanoq piviusunngortinneqassasoq, tassunga ilanngullugu aningaasanik atuinermut aamma nalunaarusiortarnermut tunngasut, nalunaarullu taanna atuutiinnassaaq atortuujunnaarsinneqarnissami tungaanut, tak. Inatsisartut inatsisaanni § 21, imm. 2.
§ 19-imut Greenland Tourism A/S, Takornariaqarneq pillugu Siunnersuisoqatigiinnut aamma Sulisa A/S-imut isumaqatigiissutinik peqareerpoq sullinneqarnissamik aaqqissuussinerit pineqartut allaffissornikkut ingerlanneqarnissaat pillugit.
§ 20-mut Aalajangersakkap taassuma imarai allaffissornikkut ingerlatsinermi aalajangikkat pillugit suliassamik ingerlatitseqqissinnaanermut periarfissat aamma naammagittaalliornissamut piffissaliussat.
§ 21-mut Imm. 1-imutInatsit atortuulissaaq 1. januar 2002.
Imm. 2-4-mut
Ikaarsaariarnermi aalajangersakkani imm. 2-4-miittuni pissutsit taaneqarput, Inatsisartut takornariartitsisarnermik inuussutissarsiuteqarnermut aamma nunami inuussutissarsiutinut aningaasalersuinikkut tapersiisarneq pillugu inatsiserisimasaat tunngavigalugit piviusunngortinneqartut, suli sorliit atuuttut. Inatsisartut inatsisaat taaneqartut naapertorlugit siusinnerusukkut nalunaarutit suliarineqartut atuutiinnassapput atorunnaarsinneqarnissamik tungaannut.